Friday, 18 June 2021

எதுவும் சாத்தியமே!

 நாடாளுமன்றம் எப்போது கூட்டப்பட வேண்டும்?

பேரரசர், சாத்தியமான விரைவில் நாடாளுமன்றம் கூட்டப்பட வேண்டும் என்று கூறியிருக்கிறார்.

பிரதமர் துறை அமைச்சர் தக்கியுடின் அதனை உறுதிபடுத்தியிருக்கிறார். ஆமாம் கூடிய விரைவில் சாத்தியமான தேதியில் நாடாளுமன்றம் நடைபெறும் என்பதாக.  

அதனையே பாஸ் கட்சியும் வரவேற்றிருக்கிறது. அரசாங்கம் கூறியதற்கு ஏற்ப பேரரசரின் அறிவிப்பு அமைந்திருப்பதாக அவர்களும் கூறியிருக்கின்றார்கள்.

ஆக, எப்போது நாடாளுமன்றம் கூடும்? விரைவில், சாத்தியமான தேதியில், கூடும் என எதிர்பார்க்கலாம்!

ஆனால் அந்த சாத்தியம் இப்போதைக்கு இல்லை என நிச்சயமாக சொல்லலாம்.   கோவிட்-19 இப்போதைக்குக் குறைவதாக இல்லை. தினசரி அது கூடிக் கொண்டே போகிறதே தவிர குறைவதற்கான அறிகுறி எதுவும் இதுவரை தெரியவில்லை! 4,000 பேருக்குக் குறைவாக இருந்தால் அரசாங்கம் சில தளர்வுகளை ஏற்படுத்தலாம் என்று சொல்லப்படுகிறது.  கூடிக்கொண்டே போகின்ற ஒரு சூழலில் அது குறைவதாகவும் தெரியவில்லை.

கோவிட்-19 குறையவில்லை என்றால், ஊரடங்கு தொடரும் என்றால்,  நாடாளுமன்றம் கூடுவது என்பது அசாத்தியமே! அதனையும் மறுப்பதற்கில்லை.

பொதுவாக மக்கள் ஒன்றைப் புரிந்து கொண்டிருக்கின்றனர். இன்றைய நடப்பு அரசாங்கம் கோவிட்-19  தொற்றை அப்படி ஒன்றும் சீரியசாக எடுத்துக் கொள்ளவில்லை என்கின்ற புரிந்துணர்வு தான் அது! காரணம் நாடாளுமன்றம் கூடக்கூடாது என்று அரசாங்கம் நினைக்கிறது. அது எப்படியோ போகட்டும். ஆனால் தனது கடமைகளை நிறைவேற்ற முடியாத அரசாங்கம் இருந்தால் என்ன, கெட்டழிந்து போனால் என்ன என்கிற மனநிலையில் மக்கள் இருக்கிறார்கள்!

செயல்படாத அரசாங்கம் என்றாலும் அரசை நிர்வகிக்கும் மேல்தட்டு வர்க்கத்தினருக்கு அது, அவர்களுக்காக செயல்படுகின்ற அரசாங்கம்.  அதனால் அவர்கள் அரசாங்கத்தை இறுகப் பிடித்துக் கொண்டிருக்கிறார்கள்!

நாடாளுமன்றம் கூடுவது என்பது விரைவில், சாத்தியமான தேதியில் கூடும் என நம்பலாம். அது எப்போது நடக்கும் என்பதை உங்களுடைய  ஊகத்திற்கே விட்டுவிடுகிறேன்.

இப்போதே நடக்கலாம்! அடுத்த மாதம் நடக்கலாம்! அடுத்த ஆண்டு நடக்கலாம்! எதுவும் சாத்தியமே!

ஊர்க்காரரா நீங்க!

 தமிழ்நாட்டுக் காரர்களைத் தான் "ஊர்க்காரர்கள்" என்று அழைக்கப்படுவது நமது வழக்கம்.

அது ஒன்றும் தவறான வார்த்தையில்லை. நாம் நல்ல பண்போடும் அன்போடும் தான் தமிழகத்திலிருந்து இங்கு வந்து வேலை செபவர்களை அழைத்து வருகிறோம்.

"நீங்கள் ஊர்காரரா?" என்று கேட்கும் போது அதிலே ஒரு பாசம் உண்டு. பரிவு உண்டு. அதில் சந்தேகமில்லை. அப்படித்தான் அது இருந்தது.

ஆனால் அதே வார்த்தை இப்போது தீண்ட தகாத வார்த்தையாக மாறிவிட்டது. ஒரு சிலர் அப்படி ஒரு நிலைக்கு அந்த வார்த்தையைக் கொண்டு வந்து விட்டனர்.

அப்படிக் கேட்பதே ஏதோ ஏளனமாக அவர்களைப் பார்த்து கேட்பது போல அவர்கள் நினைக்கின்றனர். இவர்களோ  அப்படிச் சொல்லுவதில் ஏதோ ஒரு பெரிய சாதனையைச் செய்து விட்டது போல நினைக்கின்றனர்!  கிறுக்கர்கள் என்பதைத் தவிர வேறு ஒன்றும் சொல்லத் தெரியவில்லை!

ஆனால் கொஞ்சம் ஆழமாகச் சிந்தித்துப் பார்த்தால் தமிழ் நாட்டுத் தமிழர்களை இங்குள்ள தமிழர்கள் அப்படிப் பேசி இழிவுபடுத்த  மாட்டார்கள்  என்று தான் நான் நினைக்கிறேன்.

தமிழ் நாட்டையே மற்றவர்களுக்கு விட்டுக் கொடுத்துவிட்டு தனது சொந்த மண்ணிலேயே "இளிச்சவாயன்" என்று பெயரெடுத்தவர்கள் தமிழர்கள்! அப்படிப்பட்டவர்கள்  இங்கு மட்டும் அப்படி ஒன்றும் இளிச்சவாயத்தனத்திலிருந்து விடுபட்டிருப்பார்கள் என்று நினைக்க இடமில்லை! இங்கும் அதே நிலை தான்!

பொதுவாக இந்த "ஊர்க்காரன்!" என்கிற வார்த்தை எங்கு அதிகம் பயன் படுத்தப்படுகிறது? அதைக் கொஞ்சம் ஆராய்ந்து பாருங்கள். எல்லாருடைய குற்றச்சாட்டும் இங்குள்ள உணவகங்களைத்தான் சுட்டுகின்றன.

சரி, இந்த உணவகங்களை நடத்தும் முதலாளிகள் யார்? அதை நாம் கவனித்திருக்கிறோமா? இந்த உணவகங்களைத் தமிழர்களா நடத்துகிறார்கள் என்று ஆராய்ந்து பாருங்கள்.  பெரும்பாலும் தமிழர்களில்லை. ஆனால் தங்களைத் தமிழர்கள் என்று சொல்லிக் கொள்ளுபவர்கள் தான் உணவகங்களை நடத்துகிறார்கள்! இவர்களுடைய வெளியே உள்ள விளம்பரப் பலகைகளில் கூட கீழே சிறிய எழுத்துக்களில் தமிழில் போட்டிருப்பார்கள் அல்லது தவிர்த்திருப்பார்கள்! தமிழ் நாட்டிலும் இதே நிலை தான்! இப்போதாவது புரிகிறதா? புரிந்தால் சரி!

தமிழர்களுக்கு எதிராகவே சில சமூகத்தினர் எல்லாக் காலங்களிலும் தமிழர்களை  இழிவு படுத்தவதை ஒரு கடமையாகவே செய்து வருகின்றனர்! யாரோ செய்கிறார்கள் ஆனால் தமிழர்கள் பெயர் தான் அடிபடுகிறது.

ஒன்று மட்டு சொல்லுவேன். தமிழ் நாட்டுத் தமிழர்களுக்கு எதிராக இங்குள்ள தமிழர்கள் இல்லை என்பதை மட்டும் சொல்லுவேன். அவர்களை இழிவாகப் பேசுவதை இங்குள்ள தமிழர்கள் விரும்பமாட்டார்கள். இரு பக்கமும் யோக்கியன், அயோக்கியன்  இருக்கத்தான் செய்கிறார்கள்! அது தமிழர்கள் மட்டும் அல்ல, வங்காள தேசம், நேப்பாளம், பாக்கிஸ்தான், வியட்னாம் - இப்படி எல்லா நாட்டு இனத்தவர்களிலும் உண்டு.

அவர்களுக்கு "நீங்க ஊர்க்காரரா?"  என்று கேட்கத்தான் ஆளில்லை!

Wednesday, 16 June 2021

வெற்றி மனப்பாங்கு என்பது இது தான்!

 ஒரு மாணவியைப் பற்றியான செய்தியைப்படித்த போது அவர் பாராட்டப்பட வேண்டியவர் என்று தோன்றியது.

பிரவீணா சந்திரன் என்கிற மாணவி எஸ்.பி.எம். தேர்வில் 8A  எடுத்து சாதனைப் புரிந்திருக்கிறார். அவரை விடக்  கூடுதலான புள்ளிகள் எடுத்து தேர்ச்சி பெற்றவர்கள் இருக்கத்தான் செய்கிறார்கள். இல்லை என்று சொல்லவில்லை. 

ஆனால் அவர்களுக்கும் இந்த மாணவிக்கும் ஒரு சிறிய வித்தியாசம் உண்டு.  இனி கல்வி கற்பது இயங்கலை வழி தான் என்கிற நிலை வந்த போது அவருக்குத் தேவையான மடிக்கணினி கைவசம் இல்லை. அவருடைய சூழ்நிலை  அவரால் கணினி வாங்க இயலவில்லை. 

அந்த நேரத்தில் அவரிடம் இருந்ததெல்லாம் ஒரே ஒரு பழைய கைப்பேசி மட்டுமே.  அந்த கைப்பேசியை வைத்தே  இயங்களையில் அவர் தனது பாடங்களைப் படித்து  எஸ்.பி.எம். தேர்வில் எட்டு ஏக்களை வாங்கி சாதனைப் புரிந்துள்ளார். அவரே நேர் முக வகுப்பில் கலந்து கொண்டிருந்தால் அல்லது மடிக்கணினி வசதியிருந்திருந்தால் அவரும் மற்றவர்களைப் போல பத்து, பதினோரு ஏக்களை வாங்கிக் குவித்திருப்பார்.

நம்மிடையே ஒரு பழமொழி உண்டு. வல்லவனுக்குப் புல்லும் ஆயுதம் என்று சொல்லுவார்கள்.  அதைத்தான் ஞாபகத்துகிறார் பிரவீணா. எதைப்பற்றியும் கவலைப்படாமல், தனது இயலாமையும் பற்றிக் கவலைப்படாமல் தன்னிடம் இருப்பதைக் கொண்டு சாதனைப் புரிந்திருக்கிறார் இந்த மாணவி. 

இவரை விட இன்னும் மிக மோசமான சூழலில் இருந்த மாணவர்கள் கூட பல இன்னல்கள் இடர்களைத் தாண்டி வெற்றி பெற்ற கதைகள் எல்லாம் நம்மிடம் உண்டு.

நமக்குத் தேவை எல்லாம் வெற்றி பெற வேண்டும் என்கிற ஆர்வம் மட்டும் தான்.  அத்தோடு வெற்றி பெற முடியும் என்கிற மனப்பக்குவம், மனப்பாங்கு என்பது முக்கியம்.  தோல்வியைப் பற்றியெல்லாம் சிந்திக்காமல் எப்படி வெற்றி பெறுவது என்பது தான் நம் மனதில் நிற்க வேண்டும். வெற்றி பெற நினப்பவர்களுக்கு மாற்றுச் சிந்தனை தேவை இல்லை. காரணம் நமது குறிக்கோள் என்பது வெற்றி மட்டும் தான்.

நாம் இந்த மாணவியை வாழ்த்துகிறோம்.  இவர் எந்தத் துறையில் படிக்க நினைக்கிறாரோ அதுவே அவருக்குக் கிடைக்கவும் நமது வாழ்த்துகள். 

அவர் நிச்சயமாக தான் விரும்புகிற துறையைத் தெர்ந்தெடுத்து அதிலே மாபெரும் வெற்றி பெறுவார் எனவும் நாம் நம்புகிறோம். பல இடர்களைக் கலைந்து எஸ்.பி.எம். தேர்வில் வெற்றி பெற்றவருக்கு வருங்காலங்களில் எந்த ஒரு சோதனையையும் சாதனையாக மாற்றும் இயல்பு அவருக்கு உண்டு என்பதில் ஐயமில்லை.

பிரவீணா தொடர் வெற்றிகளைக் குவிக்க வேண்டும்! வாழ்த்துகள்!