கல்வி அமைச்சர் பதவி விலகல்?

கல்வி அமைச்சர் பதவி விலகினார் என்கிற செய்தி மற்றவர்களுக்கு எப்படியோ என்னைப் பொறுத்தவரை அதனைச் சரியான நடவடிக்கையாக என்னால் ஏற்றுக்கொள்ள முடியவில்லை.

பொதுவாக அமைச்சர்கள் யாராக இருந்தாலும் சரி அரசாங்கத்தின் கொள்கைகளைத்தான் செயல்படுத்த முடியும். இன்று இவர் போகிறார். நாளை வேறொருவர் வருகிறார்.  அவரால் மட்டும் என்ன செய்து விட முடியும்? 

புதிதாக வருகிறவருக்கு ஒன்றும் விசேஷ சலுகைகள் ஒன்றும் கிடையாது. அதனை நாம் புரிந்து கொள்ள வேண்டும். அவரால் அரசாங்கக் கொள்கைகளை எதனையும் மாற்றி அமைத்து விட முடியாது. இருக்கிற கொள்கைகளை அமல்படுத்த வேண்டும். அது தான் அவருடைய வேலை!

பிரதமர் துறை துணை அமைச்சர் பொன். வேதமூர்த்தி பதவி ஏற்ற போது இந்தியர்களுக்குக் கொட்டோ கொட்டென்று கொட்டும் என்று எதிர்பார்த்தோம். எதுவும் கொட்டவில்லை! இப்போது அவர் யாருக்கு அமைச்சர் என்று யாருக்கும் தெரியவில்லை! ஏதோ பூர்விகக் குடியினருக்காகவது அவரால் சேவை ஆற்ற முடிகிறதே என்று திருப்தி அடைவோம்!

எந்தப் பதவியாக இருந்தாலும் அனைத்துத் தரப்பு மக்களையும் திருப்திபடுத்த முடியாது என்பது நமக்குத் தெரிந்தது தான்.

கல்வி அமைச்சர் பதவி என்பது மிகவும் சவாலான ஒரு பதவி.  அது மொழி சார்ந்தது.   ஒவ்வொரு இனத்தவரும் ஒவ்வொரு பக்கம் இழுத்துக் கொண்டு போகிறார்கள்! முந்தைய அரசாங்கத்தின் போது கல்விக் கொள்கைகளை ஆதரித்தவர்கள் இப்போது எதிரிகளாகச் செயல்படுகிறார்கள்.  அத மட்டும் அல்ல இன ரீதியாக பிரச்சனைகளை உருவாக்குகிறார்கள்!

இவர்கள் எல்லாம் அடுத்த ஆட்சியை இனப்பகையை உருவாக்குவதன் மூலம் தங்களது கட்டுப்பாட்டில் கொண்டு வர முடியும் என நினைக்கிறார்கள்!

ஆக, இப்போது யார் கல்வி அமைச்சராக வந்தாலும் எந்த மாற்றமும் ஏற்படப் போவதில்லை.  கொள்கைகள் அப்படியே தான் இருக்கின்றன. செயல்படுத்துவதில் தான் சிக்கல்!

கல்வி அமைச்சர் மஸ்லி இன்னும் சில காலம் நீடித்திருக்கலாம்! 

வாருங்கள்! நாமும் முன்னேறுவோம்! (2)

பொருளாதார வலிமை

நாம் முன்னேறி விட்டோம் என்றால் எதனை வைத்து  அதை அறிந்து கொள்ளுவது?  ஒன்றே ஒன்று தான். அது தான் பொருளாதார வலிமை. மற்றைவைகள் எல்லாம் அதன் பின்னால் வருவது தான். இது தான் உலகியல் பார்வை!  நாமும் ஏற்றுக் கொள்வோம்!

பொருளாதார வலிமையை எப்படிப் பெருக்கிக் கொள்வது?   வீட்டுக்கு ஒரு பட்டதாரி என்று சொல்லுவார்களே அதே போல வீட்டுக்கு ஒரு வியாபாரி என்கிற நிலை நமக்கு வர வேண்டும்.

அதே சமயத்தில் "நான் படித்து விட்டேன், அதற்கேற்ற வேலை எனக்கு  வேண்டும்!" என்று ஒரு சிலர்  வேலை அவர்களைத் தேடி வரும் வரை காத்துக் கொண்டிருப்பார்கள்!

நாட்டின் நிலைமை அப்படி இல்லை. கிடைத்த வேலையைப் பற்றிக் கொள்ளுங்கள் என்பது தான் நமது அறிவுரை.

ஆனால் நீங்கள் எந்தக் காலத்திலும் வேலைக்காக காத்திருக்காதீர்கள். ஒன்று கிடைத்த வேலையைச் செய்யுங்கள். அல்லது ஏதோ ஒரு நேரடித் தொழிலில் ஈடுபட்டு விடுங்கள். இதன் மூலம் ஒரு வேலையை நீங்கள் கற்றுக் கொள்கிறீர்கள்.  அதே சமயத்தில் புதிய அனுபவத்தையும் பெற்றுக் கொள்கிறீர்கள். பொருளாதார வலிமையும் உங்களுக்கு வந்து சேரும்.

சும்மா இருப்பது சோத்துக்கு நஷ்டம் என்பார்கள்.  'சும்மா' என்பது மட்டும் வேண்டாம்!

எந்த வேலையைச் செய்தாலும் ஒரு வியாபார சிந்தனையோடு செய்யுங்கள். வேலையைக் கற்றுக் கொள்ளுங்கள். அதன் நெளிவு சுளிவுகளைத் தெரிந்து கொள்ளுங்கள்.

அச்சகத்தில் வேலை செய்த நண்பர் ஒருவர் பிற்காலத்தில் தானே சொந்தமாக ஓர் அச்சகத்தை நடத்தி வெற்றிகரமாக தனது பிள்ளைகளுக்கு அந்தத் தொழிலை விட்டுச் சென்றார். இன்று அந்த தொழில் ஆலமரம் போல் தழைத்தோங்கி நிற்கிறது.

இப்படித்தான் ஒவ்வொரு தொழிலும்.  எந்தத் தொழிலை எடுத்துக் கொண்டாலும் அதன் ஆரம்பம் என்னவோ  சிறிது தான். 

தமிழர்களின் பொருளாதாரம் வலிமை அடைய வேண்டும்.  அதற்குப் பொருளாதார சிந்தனையை வளர்த்துக் கொள்ள வேண்டும்.

தமிழர்கள் தலை நிமிர பொருளாதார வலிமை ஒன்றே வழி!

வாருங்கள்! நாமும் முன்னேறுவோம்!! (1)

வாருங்கள் நாமும் முன்னேறுவோம்!   

இனிமேலும் யாருக்காகவும் காத்திருக்க வேண்டாம்.  காத்திருந்தது போதும்.   

மற்றவர்களின் கதைகள் எல்லாம் நம்மிடையே நிறையவே இருக்கின்றன.  மற்றவர்களின் முன்னேற்றத்தைப் பார்த்து மூக்கில் கைவைத்தது போதும்.  

இப்போது நமது நேரம். நம்மைப் பார்த்து மற்றவர்கள் வியக்க வேண்டும். வேர்த்துக் கொட்ட வேண்டும்!

முன்னேற்றம் என்று எதைப் பற்றி சொல்லுகின்றோம். இன்றைய உலகம் நம்மிடம் உள்ள காசு பணத்தை வைத்துத் தான் மதிப்பிடுகிறது.

காசு பணம், கல்வி - இதற்குத் தான் முதன்மை. காசு பணம் இருந்தால் அனைத்தையும் தூக்கிச் சாப்பிட்டு விடுகிறது!  அந்த காசு பணத்தை பாதுகாத்துக் கொள்ள கல்வி தேவை. 

கல்வி இருந்தால் பணம் சம்பாதிக்க ஒரு வழியைத் தேடிக் கொள்ளுகிறோம் . சம்பாதித்த பணத்தை எப்படி செலவழிப்பது என்று கற்றுக் கொள்ளுகிறோம். 

எல்லாம் ஒன்றுக்கொன்று தொடர்பு உடையவைகள் தான்.

பணம் சம்பாதிக்க ஆயிரம் வழிகள் இருக்கலாம். ஆனால் உங்கள் வழி  எது என்பது தான் முக்கியம்.  ஒரே ஒரு வழியைத்தான் நீங்கள் தேர்ந்தெடுக்க முடியும். அதுவும் நீங்கள் விரும்பும் ஒரே வழி.

அந்த வழி எது என்பதைத் தேர்ந்தெடுங்கள். அந்த வழியிலேயே உங்கள் கவனத்தைச் செலுத்துங்கள். 

எப்படி வேண்டுமானாலும் சம்பாதிக்கலாம் என்பது தவறான வழி!  நீங்கள் எங்கே போகிறீர்கள் என்பது உங்களுக்குத் தெரிய வேண்டும். அப்போது தான் உங்கள் கவனம் சிதறாது.

பணம் சம்பாதித்துப் பணக்காரனாவது அவ்வளவு முக்கியமா? ஆமாம், முக்கியம் தான். பணம் இல்லாதவனை இல்லாளும் விரும்பால்  என்பது உண்மை தானே!

சரி, நம்மைச் சுற்றி இருப்பவர்களைப் பாருங்கள்  பணம் இல்லாத நமது சமூகத்திற்கு என்ன மரியாதைக் கிடைக்கிறது என்பது உங்களுக்குத் தெரியாதா, என்ன? 

அதே சமயத்தில் சீன சமூகத்தினருக்குக் கிடைக்கும் மரியாதையைப் பற்றி சொல்ல வேண்டுமா? சொல்லவே வேண்டாம் அதுவும் நமக்குத் தெரிந்தது தான்!

மலாய் சமூகத்திற்கு உள்ள மரியாதை என்ன? கல்வியில் அவர்களின் மாபெரும் முன்னேற்றம். அடுத்து தொழில் துறையில் அவர்களின் ஏற்றமிகு வளர்ச்சி. 

நமது வளர்ச்சியில் எப்போதுமே ஒரு தேக்கம் உண்டு. தொழில் செய்வதாகட்டும் அல்லது கல்வியாகட்டும்  மகிழ்ச்சியடையும்படியாக ஒன்றும் இல்லை என்பது தான்!

இவைகள் மாற்றப்பட வேண்டும். நமது வாழ்க்கை முறையை மாற்றியமைக்க வேண்டும். இதற்காக யாரும் தலைவர்கள் வரமாட்டார்கள். நாம் தான் தலைவர்கள். நாம் தான் நமது தலைவிதியை மாற்றியமைக்க வேண்டும்.