நெரிசலை குறைக்க நடவடிக்கை!

 

சிறைச்சாலகளில்  2030 க்குள் நெரிசலைக் குறைக்க நடவடிக்கை எடுக்கப்படும் என்பதாக சிறைச்சாலைத் தலைமை இயக்குனர்  கூறியிருக்கிறார்.

நமக்கு ஏமாற்றமே.  கைதிகளின் எண்ணிக்கையைக் குறைக்க  நடவடிக்கை எடுக்கப்படும் என்று அவர் கூறியிருந்தால்  அது ஆரோக்கியமாக இருந்திருக்கும். தலைமை இயக்குனரின் எதிர்பார்ப்பு என்ன? இன்னும் குற்றங்கள் பெருகும்  அதனால் இன்னும் அதிகமாக சிறைகள் தேவைப்படும். அதற்காக சிறைகள் இன்னும் இன்னும் விரிவாக்கப்பட வேண்டும்!

ஆக,  எண்ணிக்கைக் குறையும் என்பதைவிட குற்றங்கள் பெருகும்  என்று அவர்  நினைக்கிறார்.  நம்மைப் பொறுத்தவரை அதாவது  நாட்டின் சராசரி குடிமகன் என்று பார்க்கும்போது  குற்றஞ்செய்வோரின்  எண்ணிக்கைக் குறைவதே  நாட்டுக்கு நல்லது என நாம் நினைக்கிறோம்.

ஆனால் தலைமை இயக்குனரோ  நேர்மாறாகக் கருத்துரைக்கிறார். குற்றங்கள் பெருகினால் - பெருகிக் கொண்டே போனால் - நாட்டின் வருங்காலத்தைப் பாதிக்கவே செய்யும்.  குற்றச்செயல்கள் குறைந்த  நாடு என்பதுதான் நாட்டிற்குப் பெருமை.  குற்றமே இல்லாத நாடு சாத்தியம் இல்லை. 

இன்றைய நிலையில் காவல்துறை முடிந்த அளவு குற்றங்களைக் குறைப்பதற்குப்  பல்வேறு  நடவடிக்கைகளில் செயல்படுகிறார்கள்.   குற்றங்கள் குறையும் என்கிற நம்பிக்கை நமக்குண்டு.  மலேசிய சமுதாயம் ஒரு குற்றமுள்ள சமுதாயமாகவே  நீடிக்கும் என்று சொல்லுவதற்கு எந்த முகாந்தரமும் இல்லை.

மலேசியர்களுக்கு வேலை வாய்ப்புகளை ஏற்படுத்திக் கொடுத்தாலே  பல பிரச்சனைகள் தீரும்.  வேலை இல்லாத சமுதாயத்தில் குற்றச் செயல்களுக்கு  அதிக வாய்ப்புண்டு.

வருங்காலங்களில்  குற்றங்கள்  கூடும் என்பதைவிட  குற்றங்கள் குறையும் சாத்தியம்  உண்டு என நம்புவோம்.

தங்க மகள் சிவசங்கரி!

 

கடந்த சில நாட்களாக மலேசியர்களிடையே மிகவும் பேசப்படும் ஒரு நபர் என்றால் அது சிங்கப்பெண் சிவசங்கரி சுப்பிரமணியம்.

என்ன தான் சாதனைகளை நாம் எதிர்பார்த்தாலும்  சாதனைகள் எதுவும் எளிதாக வருவதில்லை. உழைப்பு! உழைப்பு!  உழைப்பு!

ஸ்குவாஷ் விளையாட்டில்  உலக வெற்றியாளர்  என்பதெல்லாம்  மலேசியர்களால் நினைத்துப் பார்க்க முடியாத - எட்டாத தூரத்தில் கனவாகவே இருந்த ஒன்று. அது நிறைவேறியிருக்கிறது.

இந்த நேரத்தில் ஒரு சிறிய இடைச்செருகல்.  சிவா - வைப்பற்றி இழிவாகப் பேசினார் ஒருவர்  இதோ சிவா - சங்கரி  மூலம் "நான் யார்" என்பதைக் காட்டிவிட்டார். 

வாழ்த்துகள் சிவசங்கரி!

ஏன் பிரதமர்துறை?

 

'மித்ரா' மீண்டும் பிரதமர் துறைக்கே மாற்ற வேண்டும் என்று சிலர் அடம் பிடிப்பதற்கு  என்ன காரணமாக இருக்கும்?

பொது மக்களுக்கு அது எங்கிருந்தாலும் எந்தக் கவலையுமில்லை.  காரணம் அவர்கள் மித்ரா மூலம் பயன் அடைவதற்கான எந்த வாய்ப்புமில்லை.  அது பற்றி அல்லும் பகலும் கவலைப்படுபவர்களுக்குத்தான்  'பிரதமர் துறையா, ஒற்றுமைத் துறையா'  என்று  வாதிட்டுக் கொண்டிருப்பார்கள்.

மித்ராவின் கடந்த கால வரலாற்றைப் பார்த்தால்  மித்ரா பிரதமர் துறையில் இருந்த போது தான்  பிரபலமான திருட்டுச் சம்பவங்கள் எல்லாம் நடந்தன.  அல்லது அன்றே பேசப்பட்டன.  அப்போது ம.இ.கா.வில் உள்ள பிரபலமானவர்களின் பெயர்களெல்லாம் அடிபட்டன.  ஆனால் அவைகள் எல்லாம்  உண்மையா என்பதற்கு நம்மிடம் ஆதாரம் இல்லை.  பேசப்பட்டது என்னவோ பிரபலமான தொழில் அதிபர்கள், அரசியல்வாதிகள்  என்பது மட்டும் நமக்குத் தெரியும்.

இப்போது நமது நாடாளுமன்ற உறுப்பினர்கள் உட்பட மித்ரா பிரதமர் துறைக்கு மாற்றப்பட  வேண்டும் என்கிற அழுத்தம்  ஏன் கொடுக்கப்பட்டு வருகிறது?  நாமும் சந்தேகக்கண் கொண்டு தான் பார்க்க வேண்டியுள்ளது.  மித்ரா பிரதமர் துறையில் இருந்தால்  'கைவைக்க' வசதியாக இருக்குமோ என்று நமக்கும்  சந்தேகம் எழுகிறது.

ஆமாம் கடந்தகால வரலாறு அதனைத்தான்  சொல்லுகிறது.   ஏன் டத்தோ ரமணன் கூட பிரதர் துறையைத்தான் ஆதரிக்கிறார்.   அவரின் ஓர் ஆண்டுகால  சாதனையில்  சில ஓட்டைகளும் விழுந்ததிற்கு  அந்நிறுவனம் பிரதமர் துறையில் இருந்தது தான் காரணம். அதுவே ஒற்றுமைத் துறையில் இருந்திருந்தால் அவரால் அப்படி செய்திருக்க முடியுமா?  முடியாது என்பது அவருக்கே தெரியும்.

ஒற்றுமைத்துறையில் பணம் வீணாவதைத் தடுக்க முடியும்  என்பதை முந்தைய ஒற்றுமைத்துறை அமைச்சர் காட்டிவிட்டுப் போயிருக்கிறார். இன்றைய அமைச்சர் மட்டும்  சும்மா அள்ளிக் கொடுத்து விடுவாரா?  இங்குச் சரியான வழியில் செயல்படும் என்பது தான்  பிரதமரின் முடிவு.

அதனால் பிரதமர் துறையா என்று கேட்டால் 'இல்லை'  என்று தான் பதில் வரும்.  கொஞ்சம் சுருட்டலாம் என்று நினைப்பவர்களுக்குப் பிரதமர் துறை தான்  சிறந்தது. மக்கள் பயன் பெற வேண்டும் என்று நினைப்பவர்களுக்கு ஒற்றுமைத்துறை தான் கைகொடுக்கும்.