வாக்களிக்கும் வயது குறைப்பு...!

வாக்களிக்கும் வயதை குறைப்பதற்கான ஒரு முடிவை அமைச்சரவை எடுத்திருப்பது  பாராட்டப்பட வேண்டிய ஒரு விஷயம்.

ஆம், இப்போது மலேசியர்கள் - 21 வயதிற்கு மேற்பட்டவர்கள் = வாக்களிக்கலாம் என்னும் நிலை மாறி இனி 18 வயதிற்கு மேற்பட்டவர்கள் வாக்களிக்கலாம் என்னும் நிலை வருகிறது! அடுத்த பொதுத் தேர்தலில் இந்த மாறுதல் வரும் என நம்பலாம்.

பதினெட்டு வயது என்பது பல வெளி நாடுகளுடன் ஒத்துப் போகிறது எனச் சொல்லலாம். தாய்லாந்து, இந்தோனேசியா,  இந்தியா, பிரிட்டன், ஆஸ்திரேலியா, அமெரிக்கா, பிலிப்பைன்ஸ் போன்ற நாடுகளில் வாக்களிக்கும் வயது பதினெட்டு.  இப்போது  மலேசியாவும் அந்நாடுகளுடன் சேர்ந்து கொள்ளுகிறது.

நடைமுறையில் கார் உரிமம் பெற வயது 18.  திருமணம் செய்து கொள்ள வயது 18. வங்கியில் கடன் பெற வயது 18,  கடன் அட்டை பெற வயது 18.  குடும்பச் சொத்துக்கள் பெறவும் வயது 18.  இப்போது இவைகளுடன் வாக்களிப்பும் சேர்ந்து கொள்ளுகிறது, வயது 18.

வயது 18 என்பது ஓரளவு முதிர்ச்சி அடைந்த வயது எனலாம். மாணவர்கள் இடைநிலைப்பள்ளிகளைக் கடந்து கல்லூரிகளுக்குப் போகின்ற வயது.  கல்லூரிகள் என்பது ஒரு மாணவனை இன்னும் அதிக முதிர்ச்சியுடைய மாணவனாக மாற்றி அமைக்க உதவுகின்றவை.  

வாக்களிக்கும் 18 வயதை இப்போது அமைச்சரவை ஏற்றுக் கொண்டிருக்கிறது. இதனைச்  சட்டபூர்வமானதாக ஆக்க அரசியல் சட்டத்தில் திருத்தங்கள் செய்யப்பட வேண்டும்.  திருத்தங்கள் செய்ய நாடாளுமன்றத்தில் மூன்றில் இரண்டு மடங்கு உறுப்பினர்களின் ஆதரவு வேண்டும்.  இதற்கு எதிர்கட்சிகளின் ஆதரவு தேவை. ஆதரவு தந்தால் மட்டுமே அந்தத் திருத்தம் நாடாளுமன்றத்தில் ஏற்றுக்கொள்ளப்படும். எதிர்கட்சிகளின் ஆதரவு இல்லை என்றால்  ... முடியாது! எனினும் எதிர்கட்சிகள் ஆதர்வு தருவார்கள் என்று எதிர்பார்க்கப்படுகிறது. பொறுத்திருந்து தான் பார்க்க வேண்டும்.

வாக்களிக்கும் வயதை 18 ஆக குறைப்பதை நாம் வரவேற்கிறோம்!